انا وعصام عبد الله

الى روح الشاعر المتفرد عصام عبد الله اهدى له مدونتى المتواضعه وهى تعبير بسيط عن حبى لشعره واعماله
حكايتى مع عصام تبتدى من نص الثمانينات من القرن الماضى واحد بحب المزيكا والشعر والاغانى وبحب اسمع كلمات الاغانى واعرف اسم الشاعر المتميز ومن هنا جت معرفتى لعصام ابتديت اتابع كل اعماله اكتشفت انى قدام شاعر ملوش مثيل مختلف مش شبه اى حد
وجنب كتاية الشعر والاغانى كان عصام من رواد العمل الاعلانى كان بيكتب الاعلانات سواء اغانى او ديلوج مقروء ومن هنا وعن طريق صديق مشترك كان التعارف مكالمة تليفون واحده بينا عبرت من خلالها عن انبهارى بشعره واسلوبه الفريد وهو كان فى قمة السعاده لان فى حد عارف وحافظ كل اعماله وفى اخر المكالمه قالى الكلام فى التليفون مش حينفع لازم نتقابل وكان وعد بلقاء مع الاسف لم يتم ومن وقتها وان بحزن جدا لان عصام ما حصلش على التقدير المناسب
اللى يتساوى وموهبته وان شاء الله ححاول انى انشر ما تصل يدى اليه من اعمال عصام
وارجو من كل من يشرفنى بالزياره للدعاء لعصام بالرحمه